Hjónin Stan og Ragga sáu um að marinera og grilla mat í sumargleðinni.

Haldin var sumargleði í Rauðakrosshúsinu á föstudaginn þar sem gestir fengu að smakka á dýrindis grillmat sem hjónin Stan og Ragga sáu um að marinera og grilla, himnesku salati sem Solla á Grænum kosti töfraði fram, sumardrykknum Sólroða og í eftirrétt var boðið upp á heimatilbúinn ís. Stemningin í húsinu var einstaklega skemmtileg og maturinn rann ljúft niður, líkt og sést á meðfylgjandi myndum.
Í Rauðakrosshúsinu geta einstaklingar og fjölskyldur sótt sér sálrænan stuðning og ráðgjöf um margvísleg úrræði sem bjóðast í samfélaginu. Einnig er í boði ýmis konar fræðsla og félagsstarf sem er opið öllum. Lögð er áhersla á samvinnu, stuðning og sjálfboðna vinnu.

Hjördís Vilhjálmsdóttir, sjálfboðaliði Rauðakrosshússins, kom með eftirfarandi lýsingu á starfsemi hússins „Það sem lýsir þessu húsi best er að það er ekki spurt um aldur, stétt né stöðu heldur eru það áhugamálin sem sameina fólk hér.

Það eru allir velkomnir í Rauðakrosshúsið, sjá nánar dagskrá vikunnar hér.